Realme今日喺發佈會上，推出咗Realme 7 5G呢款機，主打中階電話市場，等我哋一齊黎睇下！
Realme 7 5G採用7nm製程嘅MediaTek天璣800U處理器，搭載6.5吋FHD+開孔式屏幕，最高可以有120Hz嘅屏幕更新率，同180Hz嘅觸控採樣率，睇片打機都可以十分流暢。機身左邊嘅卡槽採用3選2設計，可以支援5G + 5G雙卡雙待，或者一張5G電話卡搭一張microSD卡，最高可以擴充至256GB儲存空間，而機身右邊就有結合咗指紋辨識器嘅電源制。值得一提嘅喺，佢嘅機底有3.5mm耳機插頭，喺依一代嘅電話都比較難搵到，方便晒鍾意用有線耳機嘅人，同埋需要插收音咪嘅人。
相機方面，Realme 7 5G配備4800萬像素主鏡頭、800萬像素119度超廣角鏡頭、200萬像素4cm微距鏡頭及B＆W人像鏡頭，而前置就有1600萬像素自拍鏡頭。佢嘅影相功能包括超級夜景、全景、AI場景辨識、景深調節等等，用家可以根據情況切換唔同功能。而錄影上，佢支援UIS MAX防手震技術，同最高4K解像度拍攝。
Realme 7 5G電量為5000mAh，支援30W DART快速充電，大約一個鐘左右可以差滿100%電。佢亦都支援OTG反向充電，可以一機兩用，做埋隨身充電器幫其他裝置差電。另外，Realme 7 5G配備咗NFC功能，用家可以加入信用咭等等，進行電子付款。
呢部機香港將會喺2月4日上市，8GB RAM加128GB內置儲存空間版本，將會賣HKD$2,799，有銀同藍色選擇。對於追求上網速度，間唔中又會睇片、打吓機嘅朋友，喺中階價位之下呢部會喺唔錯嘅選擇。
